DAVAO CITY- Gikahibulong sa pipila ka residente ning dakbayan ang wala paghisgot ni Pangulong Bongbong Marcos sa dagkong proyekto alang sa Davao Region, kagahapon.
Kahinumduman nga nahisgutan ni Marcos atol sa iyang ikaduhang SONA kaniadtong Hulyo 24, 2023 ang dagkong mga programa alang sa Davao Region susama na lamang sa Samal Island-Davao City Connector (SIDC) ilalom sa Mega Bridge Program nga adunay P23.4B budget.
Sumala pa sa pangulo sa nakalabayng tuig nga usa kini sa iyang prayoridad sa sektor sa imprastaktura kalakip na ang Mindanao railway Project.
Gumikan niini, wala nalikayan sa pipila ka mga dabawenyos nga kwestyunon kini dungan na usab sa mga isyu nga natigayon dinhi sa dakbayan.
Nakamugna na usab kini og mga hungihong nga nawala na sa prayoridad sa pangulo ang Davao Region hilabi pa sa mga napabalitang paglayo sa relasyon niini sa pamilyang Duterte.
