DAVAO CITY- Gihagit karon ni Kanhi Pangulo Rodrigo Duterte si Pangulong Ferdinand “Bongbong” Marcos nga magpadrug-test aron maundang na ang isyu sa matud pa paggamit niini og ginadili nga droga.
Kini human sa mikatag nga video sa usa ka lalaki nga nagagamit og cocaine nga gipakita sa screen atol sa Maisug Rally sa Los Angeles, USA.
Bisan paman nga walay gibutyag nga pangalan atol sa maong video, daghanan gihapong pilipino ang nagkanayon nga matud pa hulagway kini ni PBBM.
Sa gipaguwa nga pamahayag ni FPRRD, gihagit niini si PBBM nga mopailaom sa hair follicle drug test inay nga ilimod ang maong alegasyon aron nga mahuman na ang isyu.
Giklaro usab sa kanhi pangulo nga walay kasayuran ang Hakbang ng Maisug National Leaders sa pagpaguwa sa maong video kung asa makita matud pa si PBBM nga nagasimhot og cocaine.
Sumala pa nga ang mga volunteers ang nagdesidar sa maong lakang ug wala kini gipahibalo sa Maisug Organizing Commitee.
Dugang pa sa kanhi pangulo nga mas maayong magpa-test nalang si PBBM aron sa paghatag og katin-awan sa katawhang pilipino.
Una nang gibutyag ni DILG Secretary Benhur Abalos nga edited lamang ug dili si PBBM ang naa sa video.
Sumala pa sa opisyal, pasakaan og kaso ang kinsa mang masuta nga nagpaluyo niini sanglit nakahatag kini og maling impormasyon ngadto sa publiko.
