Daghan na og nadawat nga mga text messages ang Philippine National Police (PNP) mahitungod sa nahimutangan matud pa ni Pastor Apollo Quiboloy human nila gipagawas ang 10-milyunes pisos nga patong sa ulo ni Quiboloy.
Sumala ni Philippine National Police Spokesperson PCoL Jean Fajardo, dili gilayon nila tuohan ang maong mga impormasyon tungod kay mamahimo matud pang dunay uban niini nga gi-ilad lamang ang han-ay sa kapulisan nga makapawala sa ilang pokus.
Sumala sa opisyal, wala silay nakitang dautan sa paghatag og reward money ngadto sa makatudlo sa nahimutangan ni Pastor Apollo Quiboloy, ilabina nga daan nang gibutyag ni Department of Interior and Local Government Unit Secretary Benhur Aballos nga gikan sa mga pribadong indibidwal ang maong kwarta, kinsa dismayado sa wala pa gihaon ‘pagkasikop sa religious sect leader.
Dugang ni Fajardo, dili na bag-o sa Pilipinas ang paghatag og reward money gikan sa mga pribadong indibidwal aron lang masikop ang usa ka nagtago-tago sa balaod.
