DAVAO DEL NORTE- Gikatahong nakuryentehan ang usa ka lineman atol sa iyang trabaho sa Cuambogan, Tagum City, kahapong adlawa.
Sa inisyal nga imbestigasyon sa mga otoridad, nag-ayo matud pa sa linya sa kuryente ang biktima uban ang usa pa ka lineman, apan kalit matud pa mibalik ang kuryente samtang wala pa kini nahuman sa ilang trabaho.
Gumikan sa maong panghitabo, makita sa video ang pagbitay sa usa ka lineman sa poste nga matud pa nagrabehan sa maong panghitabo.
Hinoon, gikabutyag nga natabang pa kini sa iyang kauban ug dali nga gidala sa balay tamblanan alang sa pagpaalim. Gumikan niini, daghang mga residente sab ang nagpaabot og pagpasabot sa katawhan nga sagad magpadali sa pagbalik sa kuryente kung adunay masinatiang power interruption, tungod dili matud pa dali ang trabaho sa mga lineman.
Kahinumduman nga nag-anunsyo ang Northern Davao Electric Cooperative, Inc. (NORDECO) og 12 ka oras nga scheduled power interruption sa dakong bahin sa Davao del norte ug Davao de Oro kaniadtong nakalabayng adlaw diin gikadismaya sa daghanang mga residente.
Ning kasamtangan, padayon pang gina-imbestigahan ang maong insidente, ingon man ang kahimtang sa duha ka mga lineman.
