Gikumpirma sa National Bureau of Investigation kon NBI nga usa lamang ka indibidual ang kontrobersyal nga si Mayor Alice Guo ug Guo Hua Ping, kana base sa mga fingerprints sa duha ka tawo.
Mao kana ang gibutyag kahagapong adlawa ni Senator Risa Hontiveros.
Gani aduna gayuy posibilidad nga ibalik ang Chinese Identity ni suspended Bamban Mayor Alice Guo ug pamilya niini og ugaling mapamatud-ang kini sila ang naggikan sa China.
Mao kini ang giklaro ni Eliezer Ambatali, usa sa mga direktor sa legal service sa Philippine Statistics Authority kon PSA human nga girekomenda sa ahensya nga kanselahon ang birth certificate sa suspendidong alkalde tungod sa nakita nga mga pagkalahi-lahi sa iyahang birth certificate.
Nahibal-an usab nga wala nagkatugma ang mga detalye nga nakabutang sa birth certificate sa 3 ka igsuon ni Mayor Guo lakip na ang petsa sa kalas sa ilahang ginikanan.
Sa pagkakaron, ang maong pahayag pa lamang ni Sen. Hontiveros ang naga ingon nga kini siya ang dili gayud Pilipino ug padayon pa usab nga imbestigahan og aduna bay gunit nga dokumentasyon ang alkalde ug pamilya niini nga nagapamatuod nga sila ang Chinese.
Apan og wala gayuy ebidensya nga sila ang naggikan sa China ug makansela ang ilahang birth certificate, gikanayon sa PSA official nga mamahimong ‘floating’ ang citizenship ni Guo ug sa pamilya niini.
Kahinumduman nga nitumaw ang kuwestiyonableng personalidad sa mayor dihang nalambigit ang iyang pangalan sa imbestigasyon sa POGO hub Zun Yuan Technology sa iyang lungsod nga gironda niadtong Marso ug mitumaw usab ang pasangil nga posibleng Chinese espiya siya.
