DAVAO DEL SUR- Samtang sa pikas bahin, gikanayon sa kapitan sa Brgy. Sinawilan, Matanao, Davao del Sur nga wala kini nadawatan bisan piso human sa alegasyong gikalambigitan niini kalabot sa “ayuda scam”.
Sumala pa ni Kapitan Corona Mariscal, nga wala siyay kasayuran sa nasabutan sa magsuon nga Anne ug Alice, busa dako ang katingala niini sa paglambigit sa iyang pangalan.
Dugang pa niini nga wala siyay tumong nga kuhaan ang ayuda nga alang sa mga nanginahanglan ug gani andam pa kini motabang sa katawhan.
Kahinumduman nga gisaway ang kapitan sa daghanang netizens human nakita ang video nga gi-upload ni Anne Villarin nga naghilak gumikan inay P10,000 ang iyang madawatan nga ayuda, nahimo nalang kining P1,500.
Sumala pa sa kapitan nga ang kamatuoran kabahin sa “ayuda scam” anaa lamang sa panagsabot nila Anne ug sa iyang igsuon nga usa ka Baranggay Health Worker.
Sa pikas bahin, giklaro usab ni Kapitan Mariscal nga una na niining gipasabot sa trayntay dos ka mga mag-uuma nga kinse lamang ang slot sa mga makadawat rason nga nagkasabot-sabot ang mga mag-uuma nga magtungaay sa kwarta hiungdan nga P4,500 ang nadawatan sa uban benipasyaryo sa nahisgutang ayuda.
via/ DMA
