DAVAO CITY – Miabot na sa kapin P723 million nga kantidad sa mga hinabang ang malampusong nahatud sa Department of Social Welfare and Development – Davao Region human sa nahitabong mga katalagman sama sa ulan, baha ug landslide sa managlahing bahin sa Davao Region.
Gikanayon sa Regional Director sa ahensya nga si Atty. Vanessa Goc-ong, giserbisyohan gihapon sa DSWD 11 ang mga pamilya sa rehiyon nga nabiktima sa shear line, trough sa Low Pressure Area, ug Masara landslide.
Sumala sa datos sa buhatan, anaa sa kapin 650,000 ka mga pamilya o 2 milyones kapin nga mga indibidwal ang nahatagan og food ug non food items nga gilangkuban sa mga food packs ug financial assistance alang sa mga naapektuhan sa mga nasangpit nga kalamidad.
Sumala ni Goc-ong, tungod sa hinay-hinay na nga nakabalik sa normal nga pagpanginabuhi ang ubang mga pamilyang nabiktima, adunay transisyon nga gibuhat ang DSWD, nga gitawag nilang ‘food to cash’ program nga maghatag og hinabang pinaagi sa emergency cash transfer.
Nagsugod na sila sa pagpanghatag sa probinsya sa Davao de Oro nga temporaryo unang nahunong gumikan sa nasayrang inconsistencies sa ihap sa mga nabiktima sa probinsya gikan sa ilahang PDRRMO, apan manukad kini pag-usab sa Davao Oriental.
Tumong sa maong ayuda nga makapalit na ang ilahang mga pamilya og mga pangonsumo ingon man, makapatukod na og balik sa ilahang mga panimalay.
