DAVAO CITY – Pagasugdan sa musunod nga tuig ang konstruksyon sa mga gambalay nga pagagamiton sa High Priority Bus System Project sa Davao City.
Gikanayon ni Atty. Tristan Dwight Domingo, Assistant City Administrator ug Project Head sa High Priority Bus System, mikantidad og P73.4-billion ang mga pasilidad ilawom sa Davao Public Transport Modernization Project.
Samtang, posibleng i-award ngadto sa mga midaog nga mga bidders ang pagahimuon nga 3 ka bus terminal, 5 ka bus depots, ug kapin 1,075 bus stops sugod karong Disyembre ning tuiga, o Enero sunod tuig.
Kasamtangan pang naglusad og bidding alang sa ubang bahin sa proyekto lakip ang paggagamiton nga 1,105 ka electric buses, IT Components ug uban pa.
Ang Davao Public Transport Modernization Project (DPTMP) usa ka halapad nga network sa 29 ka mga ruta nga naglangkob sa 672 km nga mga karsada nga magkonektar sa mga lugar sulod sa Davao City hangtod sa Panabo City.
Kining interconnected nga mga bus services kinahanglan nga maka-accommodate og 800,000 ka mga pasahero kada adlaw.
Kahinumduman nga karong tuiga lang nahitabo ang malampusong contract signing sa pagpasiugda sa maong proyekto nga gimugna sa City Government of Davao.
