DAVAO CITY – Electrical spark ang gitumbok nga hinungdan sa pag-ulbo sa halapad nga kalayo nga nagpaugdaw sa mokabat sa 235 ka mga panimalay sa Purok 5 ug 6, Soliman Residential Area, Japan St, Brgy Agdao Proper, Davao City, bandang alas-7 sa buntag kagahapon.
Sumala ni SFO4 Ramil Gillado, tigpamaba sa Davao City Fire District, subay sa ilang imbestigasyon nga nagsugod ang sunog sa panimalay ni Adrian Vardano diin matud pa, hinungdan niini ang nakacharge nga cellphone.
Subay pa sa pipila ka mga residente nga nakahinabi sa Bombo Radyo Davao, duna nay nahitabo nga brown out sa ilang dapit maong pila ka mga residente ang nagbantay-bantay sa posibleng pag-ulbo sa kalayo sama sa nahitabo ning nakalabayng adlaw nga nabantayan ug girespondehan sa mga residente.
Apan wala na sila kasagang sa nagdilaab nga kalayo nga nilamoy sa daghanang mga kabalayan ug kabtangan. Pasado alas-9 na sa buntag, gideklarang under control ang sunog nga miabot sa ika-3 nga alarma human miresponde ang Davao City Fire District.
Gibana-banaang mikabat sa 1.6 milyon pesos ang danyos sa insidente. Kasamtangang nagpuyo ang mga nasunugan sa Barangay Kapitan Tomas Monteverde covered court duol sa nasunog nga banda diin natabangan sila sa Davao City LGU.
via || Bombo LJF
