DAVAO CITY – Substandard , mao kini ang singgit sa mga ralysita nga midagsa sa atubangan sa buhatan sa Northern Davao Electric Cooperative Inc. (NORDECO) gumikan sa sayop nga serbisiyo niini sa ilang gisakopan sa probinsya.
Diin, muabot sa 3,000 ka mga lumulupyo sa Island Garden City of Samal (IGACOS) ang mipasibaw sa ilang reklamo kinsa puros mga konsumidor sa IGACOS ang milusad og protesta gumikan sa sayop nga serbisyo sa ilang kuryente sa ilang lugar.
Matud sa mga relysita nga sukad 2016, gaantos na sila sa substandard nga serbisyo sa kuryente sa ilang gisakopan. Sumala sa usa ka ralysita nga gitambongan sa lokal nga panggamhanan sa Samal, nga mawad-an sila og kuryente gikan upat hangtud lima sulod sa usa ka adlaw maong kadaghanan kanila ang magubaan og mga appliances nga maapektuhan ang ilang panginabuhian.
Gikanayon usab sa bise mayor sa IGACOS nga si Lemuel Reyes, nga pipila sa mga apektado niini, ang mga estudyante nga mapugos musulod sa ilang mga tulunghaan nga walay ligo gumikan konektado ang ilang suplay sa tubig sa kuryente.
Alang kang Reyes, apektado usab ang mga negosyo sa lugar ilabi na sa sektor sa turismo sa isla. Nunot niini, nanawagan ang mga ralysita ngadto kang Pangulong Ferdinand Marcos Jr. nga aksyuhan ang dugay na nga suliran sa ilang lugar.
Gawas pa niini, nanawagan usab ang nahisgutan nga hatagan na og pagtagad ang resolusyon nga House Bill 10554 nga giduso ni Rep. Margarita Ignacia Nograles, sa Puwersa ng Bayaning Atleta Partylist, aron ihunong na ang Nordeco isip tig-suplay sa kuryente sa Tagum City, Island Garden City of Samal, ug mga munisipalidad sa Asuncion, Kapalong, New Corella, San Isidro, at Talaingod.
