DAVAO CITY – Giawhag sa City Disaster Rik Reduction and Management office (CDRRMO) ang dabawenyos nga mahimong mabinantayon sa pabag-o bagong kahimtang sa panahon. Suma sa hepe sa buhatan nga si Alfredo Baloran, anaa na ta karon sa transition period gikan sa La Niña paingon sa El Niño, diin magsugod gikan Pebrero padulong Marso, apan kon mamatikdan , padayon gihapon nato masinatian ang pabag-o nga weather disturbances. Busa nagpahimangno na lamang kini nga dili magkumpyansa ug pirmi mag-igmat partikular na sa mga residente nga nanimuyo sa mga flood prone ug land-slide prone areas. Subli pahimangno ni Baloran ngadto sa publiko nga dili hulaton nga pwersahon pa ipabakwit kon anaa na kini sa peligro. Gawas pa niini, gikanayon ni Baloran nga mihangyo na sila og panagtigom kauban ang City Engineer’s Office (CEO) , ug ang Office of the City Building Official (OCBO) aron lantawon kon unsay angay himoon aron mapaspasan ang mga proyekto sa kadalanan tungod duna usab risgo sa mga alternatibong agianan kon maapektuhan man kini og kusog nga pag-ulan.
