DAVAO CITY – Giregaluhan sa mga sakop sa LTO 11 ug usa ka iladong motorcycle store chain sa nasud og helmet ang mga motorista nga nibaybay sa kadalanan sa Barangay Maa ning dakbayan.
Gipangkulbaan pa ug una ang mga motorista gumikan sa pagpara sa mga mga sakop sa LTO, apan nakambyuan ug kahupayan ang ilang kaguol tungod gisorpresa mismo sila sa LTO ug bag-ong helmet nga ilang magamit sa matag byahe.
Dagko ang pasalamat sa mga riders sa regalo sa buhatan kanila ilabi nang usa kini sa mahalon nga gamit sa matag motorista.
Dala sab sa maong ambush gift-giving ang subling paghinumdum sa ahensya nga kanunayng sundon ang pagsuot ug helmet matag byahe.
Subay sa Republic Act 10054 kon Mandatory Use of Motorcycle Helmets nga unang gipirmahan ni kanhi Pangulong Gloria Macapagal-Arroyo niadtong 2004, pagamultahon ang mga masinupakong driver og P1,500 alang sa 1st offense; P3,000 sa 2nd offense; P5,000 sa third offense; ug P10,000 sa ulahing offense ug pagkumpiska sa lisensya niini.
Kabahin sa safety measures sa matag driver sa motorsiklo ug sakay niini ang pagsul-ob ug proteksyon sama sa helmet aron malikayan ang kumplikasyon sa aksidente sa kadalanan.
via || Bombo LJF
