DAVAO CITY – Panid-an sa Davao City Police Office ang mga kabatan-onan nga magtapok-tapok karong Misa de Gallo sugod Disyembre 16.
Nasayod ang spokesperson sa DCPO nga si Police Major Catherine dela Rey nga dunay mga kabataan nga maglatagaw ug magsinamok sa gawas sa mga simbahan matag misa inay nga musimba ug mag-ampo.
Tungod niini, makig-koordina ang pulisya sa mga barangay tanod alang sa pagbantay sa matag simbahan aron malikayan sab ang posibleng engkwentro sa mga kabatan-onan.
Gawas niana, magpakatag sab ang kapulisan ug siyete mil ka mga personahe sa 41 ka mga Katoliko Romano nga simbahan lakip ang sais syentos ka mga police auxillaries atol sa nuwebe dias nga pagsimba sa kaadlawon una pa ang adlaw sa Pasko.
Gilauman sab sa kapulisan ang pagdagsang sa mga manimbahay tungod sa mas gipaluag nga mga restriksyon human sa lapas duha ka tuig nga pagkahunong sa Misa de Gallo panahon sa pandemya.
VIA || Bombo LJ Florendo
