DAVAO CITY – Nagpahigayon na og hot pursuit operation ang kapulisan sa Sta. Cruz, Davao del Sur batok sa usa ka Jessie Bon Palomo, ginatudlong suspek sa pagpatay sa duha ka mag-igsoong babaye nga nakaplagan na lamang wala nay kinabuhi sulod sa ilang panimalay.
Sa impormasyon gikan sa kapulisan, giila ang mga biktima nga sila alyas Cel Marie, 15 anyos, babae, estudyante ug alyas Ahis, 9 anyos, ug susamang residente sa Prk. Mangga, Landing, Brgy. Inawayan, Sta.Cruz, Davao del Sur.
Una nang nasayran nga nagpuyo ang mga biktima sa maong dapit kauban ang ilang ama-ama o stepfather nga giilang si Jessie Bon Palomo, residente sa Cotabato City.
Apan ning kasamtangan, wala pa kini makit-i sa otoridad diin ginalantaw kini nga posibleng misibat. Usa sa anggulong ginatutukan karon sa kapulisan nga posibleng gilugos matud pa si alyas Cel Marie sa iyang ama-ama kini human nga wala na kini nagsul-ob og underwear.
Sa pikas bahin, nasayran nga kaganihang ala una sa kaadlawon, nakadungog matud pa ang usa ka witness nga si alyas Ronel, lalake, 16 anyos, silingan sa mga biktima, og syagit nga nagpakitabang ang mga biktima apan gi-dedma lamang matud pa kini sa nahisgutan.
Apan alas singko kaganihang buntag, mi-adto si Ronel sa balay sa mga biktima aron nga sutaon ang iyang nadungog. Nakurat na lamang kini human nga sa dihang pagsulod niya sa kwarta sa mga biktima, nakita na lamang niya nga wala nay kinabuhi ang duha ka mga batang babaye.
Gumikan niini, daling nagpakitabang si Ronel sa iyang inahan rason nga dali sab kining girespondehan sa kapulisan. Nakig-alayon na ang kapulisan sa Davao del Sur ngadto sa Police Regional Office (PRO) 12 alang sa pagpangita sa suspek.
Patay’ng lawas sa mga biktima ang gidala na karon sa Esperanza Funeral Parlor sa Brgy. Zone III, Sta. Cruz, Davao del Sur alang sa ipahigayong autopsy Examination, DNA examination ug vaginal Swab.
