DAVAO CITY- Muabot sa 49 ka mga batan-on ang malampusong na-rescue sa Mindanao Coalition on Children’s Rights human nga nalambigit ang mga nahisgutan sa iligal nga kalihukan.
Sa maong ihap, 45 niini ang gilangkuban sa mga batang lalake. Kini mismo ang gikumpirma ni Noli Nephi Dimaandal, Information Officer sa Philippine Drug Enforcement Agency (PDEA) XI.
Sumala kang Dimaandal, gigamit matud pa ang nahisgutang mga bata sa kaugalingon nilang mga ginikanan aron mamaligya o magpayuhot og iligal nga droga.
Subay sa pagsaulog sa National Children’s Day karong umaabot nga Nobyembre 20 ning tuig kasamtangan, adunay pipila ka mga aktibidad ang gipahigayon sa PDEA XI kauban ang Kiwanis International Division 7, Sunflower Kidz Movement, Mindanao Peace Council ug National Commission on Muslim Filipinos sama na lamang sa story telling nga adunay titulo nga “Dagan Totoy” ngadto sa magtutungha nga anaa sa Kinder hangtud Grade 1.
Ang nahisgutang istorya ang nagtuyok sa kasamtangang panghitabo sa nasud diin ang mga kabatan-onan maoy ginagamit sa mga ginikanan aron maoy mamaligya og droga ug sa paglabay sa panahon nga sila mamahimo na usab nga hamtong, sila na sab ang mugamit sa ilang mga anak alang sa iligal nga binuhatan.
Matud pa kang Ma. Rosario Suarez, ang presidente sa MCCR, nga ‘the cycle goes on” kung dili matud pa mahatagan og igong lakang o interbensyon ang maong sitwasyon.
Sa pikas bahin, aduna usab room to room lecture ang gipahigayon sa mga intern students sa PDEA XI ngadto sa 19 ka mga classroom sa Bolton Elementary School ug 22 ka mga classroom usab sa Cesario Elementary School alang sa mga magtutungha nga anaa sa grade 3,4,5 ug 6.
Ang maong kalihukan ang mas gipahugtan tungod kahinumduman nga sunod-sunod usab ang mga gipangkasa nga mga buy-bust operation sa kapulisan batok sa mga tigpayuhot og iligal nga droga diin kasagaran sa mga nalambigit mga kabatan-onan.
Samtang, nanawagan ang PDEA XI ug Sunflower Kidz Movement sa katawhang dabawenyo nga kung mamahimo, itaho dayon kung adunay masayran nga mga iligal nga kalihukan ilabi na og nalambigit ang mga kabatan-onan aron nga gilayong matabangan ug ma-rescue ang mga nahisgutan.
