DAVAO CITY- Subay sa paghinumdom sa kalag-kalag diin nag-unang ginahimo sa mga katoliko mao ang paghalad og pagkaon, bulak ingon man pag-ampo alang sa mga kalag, gitugutan sa lokal nga panggamhanan sa Davao ang Archdiocese of Davao nga magpakatag og mga Pangulo sa Liturhiya o PSL ilabi na sa mga pampublikong sementeryo aron magpahigayon og responso sa mga lubnganan.
Kini mismo ang gikanayon ni Bro. Nelson Zapatera, usa ka PSL ilalom sa San Miguel Parish sa Sasa ning dakbayan atol sa pakighinabi sa Bombo Radyo Davao.
Sa pikas bahin, galibot ang mga PSL sa mga sementeryo aron nga dali lamang sila maduolan sa mga pamilya nga buot pa-ampoan ang ilang mga mahal sa kinabuhi nga mipanaw na.
Apan gipaklaro ni Bro. Zapatera nga magdepende lamang sa tagtungod sa minatay kung muhatag ba sila og donasyon o dili tungod wala silay ginapangayo gumikan tumong lamang nila sa maong kalihokan nga makahatag og pag-ampo ngadto sa mga minatay nga mao usab ang hinungdan sa pag- obserba sa kalag-kalag.
