DAVAO CITY – Gikasubo sa mga drayber sa dakbayan ang matud pa pagsaka sa presyo sa mga produktong petrolyo sugod kagahapon.
Sa pakighinabi sa Bombo Radyo Davao ngadto kang Oliver Campos, usa ka tsuper sa PUJ, gikakurat nila ang pagpatuman ug price hike sa gasolina ug krudo, ilabi na ang pagpatuman sa taas pasahe sa mga pampasaherong jeepney.
Bisan pa man sa pagkuha sa taripa nga gipagawas sa LTFRB nga nakapaskil karon sa mga sakyanan, duna gihapon mga pasahero nga nagabayad ug ubos sa dose pesos nga plitehan.
Dako sab nga hisgutanan sab sa mga drayber ang maintenance sa ilang mga sakyanan, nga sagad daw nagmahal ang mga piyesa sa sakyanan.
Sa kinatibuk-an,gikabalak-an karon sa mga drayber na sama ni Campos ang pagpaigo sa ilahang kita gumikan sa pagmahal sa krudo taliwala sa ginapatumang fare hike sa rehiyon.
Kahinumdumang gipatuman kagahapon og oil price hike nga Php 1.20 sa matag litro sa gasolina, Php 3.50 matag litro sa kerosene, ug Php 6.85 usab sa matag litro sa diesel nga epektibo alas 6 sa buntag kagahapon.
Samtang giaprubahan na sa LTFRB 11 ang pagpatuman ug P12 nga pletehan sa mga pampasaherong jeep.
Nagpahibalo ang buhatan nag dili sila basta-basta magpatuman ug taas pasahe ang mga drayber nga wala pa nakakuha sa taripa nga ilang ipaskil sa mga sakyanan.
via || Bombo LJ Florendo
