DAVAO CITY – Andam gilayon ang mga bus operators sa Davao City nga mopakatap og dugang units ubos sa Peak Hours Augmentation Bus Service (PHABS) kung mahitabo nga magpadayon ang reklamo sa mga sumasakay tungod sa kakuwang sa public utility jeepneys.
Sumala ni Dionisio Abude, hepe sa City Transportation and Traffic Management Office (CTTMO), nga ang mga operators gihatagan ug special permit ubos sa PHABS aron maka-deploy ug dugang mga bus kung gikinahanglan.
Dugang pa niini, ang espesyal nga permiso gi-isyu aron tugotan ang mga kompanya sa bus sa pagserbisyo sa mga ruta nga padulong ug gikan sa central business district diin namatikdan ang kadaghan sa mga pasahero.
Kini mao ang Golden Valley Bus Line nga nagserbisyo sa Lasang-Tionko Route; Land Car Incorporated para sa Toril-Roxas nga ruta ug Davao Metro Shuttle para sa Calinan-Roxas ug Catalunan Grande-Roxas nga ruta.
Ang CTTMO nagkanayon nga adunay kinatibuk-ang 21 ka bus units ang gipakatap aron matubag ang nagkadaghang reklamo sa mga pasahero tungod sa kakuwang sa public utility jeepneys atol sa peak hours gikan sa alas 5 hangtod alas 8 sa buntag ug alas 5 hangtud alas 8 sa hapon gikan Lunes hangtod sa Biyernes.
via || Bombo Bryan Chin Abe
