DAVAO CITY – Wala pay bisan unsa nga transport sector ang miduso og petisyon alang sa usbaw sa pletehan diri sa dakbayan sa Davao o sa opisina sa Land Transportation Franchising and Regulatory Board XI.
Kini mismo ang gikumpirma ni LTFRB XI Regional director Nonito “Don” Llanos III atol sa pakighinabi sa Bombo Radyo Davao. Matud pa sa opisyal nga mingaw ang katikaran sa duha ka mga tranport groups dinhi sa syudad apan didto sa kaulohan, ubay-ubay na ka mga transport group ang nagfile og petition sa nagkadaiyang denominasyon dili lamang sa jeepney apan lakip na sa mga taxi.
Kahinumduman nga una nang gikanayon sa Land Transportation Franchising and Regulatory Board (LTFRB) nga posibleng mapagawas na niini sa sunod nga semana ang pinal nga kantidad sa dugang pasahe sa jeep nga dugay na matud pang nakaplano.
Sumala kang LTFRB Chairperson Cheloy Velicaria-Garafil, ginatun-an pa nila kung P3.00 o P4.00 ba ang ipatuman nga dugang pasahe, depende sa resulta sa petisyon gikan sa mga jeepney groups. Sa pikas bahin, gikanayon sab ni Llanos nga magpaabot lamang matud pa ang LTFRB XI sa unsa may mamahimong desisyon sa kaulohan. Matud pa niini nga kung ugaling magdesisyon nga ipatuman kini nationwide, kinahanglan gayud kining sundon.
