DAVAO CITY – Anaa matud pa gihapon nagpabilin sa kasing-kasing sa mga Pilipino ang gihimong pakigbisog sa mga bayani sa nasud Pilipinas apan usa ka dakong hagit karon sa sektor sa edukasyon kung unsa pagpaila sa mga bag-ong henerasyon kung kinsa kining mga bayani nga nagsakrispisyo sa ilang kinabuhi aron lamang maangkon sa Pilipinas ang kagawasan gikan sa mga langyaw nga mananakop.
Kini mismo ang gibutyag ni Kevin Paul C. Bonotan, magtutudlo sa Holy Cross of Davao College, Inc. atol sa pakighinabi sa Bombo Radyo Davao dungan sa pagsaulog sa National Heroes’ Day karong adlawa.
Dugang pa ni Bonotan nga padayon ang pagpaningkamot karon sa sektor sa edukasyon alang sa subling pagpa-ila sa mga bayani ug kasaysayan sa nasud Pilipinas pinaagi sa Balik Kasaysayan Program. Usa kini ka dakong programa nga nagtumong ug nagsentro sa pag-ila sa mga bayani dili lamang sa nasyunal nga lebel apan lakip na sab sa mga bayani nga anaa sa tagsa-tagsa ka mga lokalidad.
Target sa maong programa nga mas masabtan ug maila sa mga kabatan-onan ang mga bayani ug dili lamang kutob sa pagsag-ulo sa pangalan sa mga nahisgutan. Pinaagi matud pa niini, mahagit usab ang katawhan ilabi na mga kabatan-onan nga sama sa mga bayani, unsa sab ba ang mamahimo nilang kaayohan alang sa nasud.
Dugang pa ni Bonotan nga ang pagka-bayani ang walay kumpletong depenisyon apan kitang tanan mamahimong magmadaugon ug mamahimong bayani pinaagi sa atong tagsa-tagsa ka mga gimbuhaton sa komunidad.
