DAVAO CITY – Paghatag og dungog sa Pilipinas – mao matud pa kana ang pamaagi ni Sprint Queen Lydia de Vega aron mapakita niini ang paghigugma sa nasud.
Sa pakighinabi sa Bombo Radyo Davao kang Chardie Ramos, usa sa mga suod nga higala ni De Vega, gilab-as niini ang mga maayong kinaiya nga anaa ang Asia’s Fastest Woman. Dili matud pa ikalimod nga usa ka isog nga babaye si De Vega bisan paman sa sakit niining breast cancer.
Dugang pa ni Chardie nga bisan paman soud sila nga higala, bisan kanus-a, wala matud pa gihusgutan ni De Vega ang gihambin niini nga balatian gumikan usa kini ka pribado ug hilomon nga indibidwal.
Aduna matud pa kini pagrespeto sa mga pribadong impormasyon ug pribadong kinabuhi sa iyang mga higala. Si Chardie ang nagsugod lamang isip Fan ni Diay apan wala kini nagdahom nga mamahimo niya kining soud nga higala.
Alang kang Chardie, usa ka dakong blessing matud pa gikan sa Ginoo nga nahimo niyang higala ang usa ka Atleta nga adunay dakong pagmahal sa pagserbisyo sa nasud.
Kahinumduman nga mipanaw sa edad nga 57 anyos ang legendary athlete sa nasud niadtong Agosto 10.
Via || ANGIE CHAGAS
