DAVAO CITY – Nunot sa nahitabong sunod-sunod nga pagbaha ug pagdahili sa yuta sa Davao De Oro , gipahimangnoan ni Provincial Disaster Risk Reduction Office Head Joseph Randy Loy ang tanang katawhan nga mag-igmat kanunay ilabi na kung adunay ipagawas nga advisories ang ilang buhatan kabahin sa paghikling ug pre-emptive evacuation.
Nanghangyo ang opisyal nga hingpit kining sundon sa alang sa kaluwasan sa tanang katawhan sa Davao de Oro.
Matud sa opisyal, kini lamang ang bugtong pamaagi aron malikayan ang pagkawala sa kinabuhi ug aron makadala pa sa mga kabtangan.
Gipanghingusgan usab sa PDRRMO ang tanang katawhan nga magmonitor sa dagan sa panahon gumikan pabag-o bag-o ang masinatian nga kahimtang sa panahon karon.
Gumikan niini, giawhag ni Loy nga mamahimong mag-andam sa ilang mga kabtangan nga buot madala ugaling adunay ipatuman nga pre-emptive evacuation.
Samtang, malipayon sab ang buhatan sa PDRRMO ngadto sa mga katawhan sa Davao De Oro tungod naminaw og mituman kini sa ilang matag karon ug unya nga mga pahimangno ugaling adunay mga pre-emptive evacuation advisories.
Gisiguro sab sa opisyal nga adunay mga nagkalan-laing rescue clusters sa gobyerno ang muresponde sa ilang panginahanglon ilabi na ang paghikling kanila ngadto sa luwas nga lugar.
Samtang, nanghinaut si Loy nga makatala kanunay og “zero casualty” matag higayon nga adunay kalamidad nga maigo sa ilang probinsya.
Via || Hana Rallos
