DAVAO CITY – Gipaklaro karon nga dili public documents ang mugshot ingon man ang police blotter. Kini mismo ang gikanayon ni Pol. Major Eudisan Gultiano, tigpamaba sa Police Regional Office XI, atol sa gipahigayong AFP-PNP Press Corps.
Matud pa nga makonsidera lamang kini nga public documents sa higayon nga adunay pagtugot gikan sa suspek o ang mga nalambigit nga ipagawas sa publiko. Subay kini sa gipatuman nga Memorandum Circular 2007-001 kaniadto ni kanhi Police Chief Superintendent Atty. Raul Bacalso.
Ang maong pahayag sa opisyal ang subay sa mga pangutana mahitungod sa suspek nga mipusil sulod sa makadaghang higayon sa usa ka 19 anyos nga batan-on sa usa ka bar sa Davao niadtong milabay’ng semana.
Dugang pa ni Atty. Gultiano nga mamahimong muadto ang mga media sa San Pedro Police Station aron masayran ug makumpirma kung anaa ba gayud naka detain si Pepino. Apan gipaklaro lamang sab sa opisyal nga mamahimong istriktong ipatuman ang dili pagkuha og picture sulod sa prisohan.
Sa pikas bahin, gikumpirma sa opisyal nga ning kasamtangan, nagfocus sila sa preliminary investigation nga giduso sa kampo sa suspek nga si Dr. Marvin Rey Andrew R. Pepino.
By Bombo Alliane Silao
