DAVAO CITY – Pipila na ka mga barangay sa dakbayan sa Dabaw ang nakahimo na sa pagpatukod sa ilang kaugalingon nga cooking oil collection system sama na lamang sa Barangay Hizon, Mintal ug Sasa ning syudad.
Labot niini, gidasig sa CENRO ang tanang mga barangay sa dakbayan sa Dabaw nga mosalmot usab sa nahisgutang proyekto ug magpatukod na sa ilang kaugalingon nga sistema sa oil collection.
Ang collection sa used cookng oil sa barangay level ang nagsugod niadto pang Oktobre tuig 2017 apan temporaryo kining gipahunong human makita nga ang maong sistema ang dili kasaligan isip tinubdan alang sa BioDiesel Fuel Plant sa dakbayan.
Gumikan niini, nahunahunaan sa syudad nga moduol sa mga restaurants ug mga fast-food chains alang sa kanunay nga suplay sa used oil.
Karon, subling gibalik na usab sa CENRO ang pagkolekta og used cooking oil sa barangay level alang sa produksiyon sa biofuel.
Gawas niini, 10% sa makolekta nga used oil ang gamiton isip raw material sa paghimo sa biodegradable wastes ngadto sa compost.
Tumong usab sa nahisgutang programa nga makunhuran ang mga mantika nga ginalabay sa mga kanal nga maoy hinungdan sa pagbara ug pag-grabe sa pagbaha sa syudad.
Samtang, subling nanawagan si CENRO Information Education Campaign Unit Spokesperson Mr. Orly Limpangog ngadto sa tanang dabawenyo nga dili ilabay ang ilang mga used cooking oil, inay tigumon kini aron makolekta sa mga taga barangay ug iturn-over ngadto sa oil refinery sa syudad nga naa nahimutang sa CENRO composting facility sa Barangay Ma-a.
Ang biodiesel fuel plant sa syudad nga giponduhan sa Japan International Cooperation Agency (JICA)—ang nakahimo na sa pag-produce og moabot sa 200,000 liters sa biodiesel sukad nga kini ang gilusad niadtong August 2017 hangtud April 2022.
Nagahatag na kini og fuel sa mga compactor trucks ug uban pang sakyanan nga ginagamit sa syudad sa pagkolekta og mga basura.
Via || Angie Chagas
