DAVAO CITY – Mamahimong normal lamang gihapon ang dagan sa transaksyon sa tanang mga departamento sulod sa Sangguniang Panlungsod Building karong adlaw nga Lunes, Hunyo 27, 2022.
Kini bisan pa man nga himuon sa nahisgutang adlaw ang pormal nga pagpanumpa ni Davao City mayor-elect Sebastian Baste Duterte sa session hall sa second floor sa SP building.
Hinoon, gikanayon ni Davao City Police Office (DCPO) spokesperson PMaj. Ma. Teresita Gaspan nga ipatuman sa kapulisan ang hugot nga seguridad sa nahisgutang dapit gumikan kay tambungan ang oath-taking sa incoming mayor sa iyang amahan nga si Pangulong Rodrigo Duterte ug VP Inday Sara Duterte ug sa uban pang mga miyembro sa pamilyang Duterte.
Dugang gitino sa DCPO nga walay himuon nga mga road closure atol sa aktibidad, apan adunay pipila ka mga dalan ang gidili una nga ma-parkingan og mga sakyanan sugod sa adlaw nga Lunes, ala una ang takna sa kaadlawon hangtud alas 6 sa gabii.
Kini ang langkuban sa mga kalsada sa Bolton, Ponciano, San Pedro, Magalllanes, City Hall drive ug sa City Engineers alley.
Mokapin sa nuebe sientos ka mga pulis ang ipakatag sa DCPO atol sa maong adlaw diin wala pay apil ang mga miyembro sa security cluster.
Human ang pagpanumpa ni Mayor Baste sa SP Building kang Judge Loida Cahulugan, himuon niini ang iyang inaguaral speech sa gawas nga bahin sa city hall building sa syudad.
Imbitado usab ang publiko nga musaksi sa pagpamulong ni Baste isip ika-23 nga mayor sa dakbayan sa Dabaw.
Via || Angie Chagas
