DAVAO CITY – Napalgan na lamang nga wala nay kinabuhi ang usa ka security guard sa usa ka establisyemento sa dalang Illustre ning syudad bandang alas 7:15 kagahapon, Hunyo 23, 2022.
Giila ang maong lalaki nga si Joel Gabantes, 62 anyos , minyo, security guard sa Felcris Illustre ug residente sa Better Living, Toril Davao City.
Narekober ang patay’ng lawas sa lalaki human nakadawat ang kapulisan sa San Pedro Police Station og report nga adunay nadiskubrehang patay’ng lawas.
Gumikan niini, gilayong nagpahigayon og imbestigasyon sila Police Senior Master Sergeant (PSMS) Felipe G. Tiu Jr. ug Police Staff Sergeant Rojemar Estecomen sa nasangpit nga dapit.
Subay sa inisyal nga imbestigasyon sa kapulisan, gikanayon sa nakasaksi nga si Rosalito Nacionales, gi turn over ni Gabantes ang iyahang armas kang SG Banny Badjo ug mibalik kini sa iyang post ug didto na siya nahagba.
Dugang pa sa nakasaksi, mitawag dayon siya og ambulansya aron masalba kini apan bandang 7:10 sa buntag, gideklara kini ni Dr. Olmoges nga nakabsan na kini sa kinabuhi.
Samtang, miabot sa maong dapit ang asawa sa biktima nga si Daisy Gabantes ug nagtuo kini nga walay foul play nga nahitabo ug gumikan kini sa iyang hypertension.
