DAVAO CITY – Gipakusgan sa city health office ang kampanya niini batok dengue subay na usab sa national dengue awareness month karong bulan sa hunyo.
Usa sa gihimong kampanya sa CHO batok dengue ang pagpahigayon ug rekorida sa tropical diseases and nutrition division sa CHO partikualr na sa Leon Garcia Agdao ning syudad diin gikatala karong tuiga lamang ang 2 ka kaso sa dengue.
Gawas sa rekorida, mihimo usab ug fogging , misting, ug surveillance sa barangay diin gipangbungkag ang mga nagpundong tubig nga magsilbing breeding ground sa mga lamok nga nagdala ug dengue virus. Gikan sa bulan sa Eneroi hangtud sa Mayo niining tuiga lamang moabot sa 654 ka mga kaso sa dengue ang gikatala sa dakbayan sa dabaw ug 3 usab ang namatay.
Mas taas kini kung itandi sa susamang mga bulan niadtong milabay nga tuig 2021 nga mitala ug 505 ka mga dengue cases, apan 4 usab ang gikatalang namatay. Ang tulo ka mga namatay karong tuiga nga naggikan sa barangay centro agdao, tamugan ug 76-A Bucana. Kahinumduman nga niadtong tuig 2010 gikatala sa syudad ang dengue outbreak diin 10,983 ka mgka dengue cases ang gikatala ug moabot usab sa 88 ang mga nangamatay.
