DAVAOL CITY – Isip kabahin pa gihapon sa pagpalig-on sa vaccination roll out sa dakbayan, laraw karun sa Covid-19 Task Force nga mag-administer ug booster shots ngadto sa mga empleyado nga nadestino sa mga national government offices sa siyudad.
Himuon ang nahisgutan nga lakang human nga anaa sa kapin 50 porsyento sa mga fully vaccinated nga mga empleyado ang wala pa nakakuha sa ilang booster doses.
Sumala pa kang COVID-19 Task Force Spokesperson Dr. Michelle Schlosser nasubay na sa Vaccination Cluster ang vaccination status sa mga nahisgutan nga government offices sa dakbayan.
Pipila sumala pa sa mga government regional offices ang gilangkuban sa Bureau of Internal Revenue, Bureau of Fisheries and Aquatic Resources, Commission on Audit, Department of Agriculture, Department of Agrarian Reform, National Housing Authority, ug Office of Civil Defense.
Aduna sumala pay mga government offices diin ang ilang mga empleyado ang fully vaccinated apan wala pa nakakuha sa ilang booster shot.
Gipasalig ni Schlosser nga aduna silay igong mga sakop nga magpahigayon ug in-office mobile vaccination rollout.
Gani nasubay na matud pa karon sa Human Resource Management Office (HRMO) ang 1,900 fully vaccinated employees kalakip na ang plantilla, job order, ug contract of service nga wala pa nakapa-booster shot.
Tutukan sab sumala pa nila ang Vaccination Cluster arun masiguro nga ang lokal nga mga empleyado sa siyudad ang fully vaccinated, boostered ug adunay igong proteksiyon sa kaugalingon.
Samtang ang 1,200 contact tracers sa siyudad ang nagkinahanglan sab ug booster jabs isip mga frontliners ug nakighimamat sa mga COVID-19 patients ug mga kliyente.
Ang nahisgutan nga estratihiya ang kabahin sa nagpadayon nga rollout pinaagi sa vaccination hubs, mobile, drive-thru, sectoral, ug house-to-house alang sa 12 ngadto na 17 ug adult population age groups; ingon man special site vaccination sites alang sa pediatric nga singko ngadto na 11 anyos nga populasyon.
