DAVAO CITY – Aduna igong personahe ang kapulisan aron nga ipakatag sa 16 ka mga munisipalidad sa Davao region nga gitutukan karon sa Police Regional Office (PRO) 11 sa watchlist usa ka bulan ayha ang May 9 Local and National elections luyo sa nagkagrabe nga panag-atbang sa mga pulitiko ingon man presensiya sa New People’s Army (NPA).
Sumala pa kang Maj. Eudisan Gultiano, tigpamaba sa PRO-Davao, nga gipahugtan karun sa kapulisan sa rehiyon ang pagbantay sa nahisgutan nga mga dapit aron nga mapugngan ang bisan unsa man nga election-related incidents.
Sa nahisgutan nga ihap, walo niini ang gipailalom karon sa “yellow” category gumikan sa init nga panag-atbang sa mga politiko kaniadtong milabay nga eleksiyon.
Ang maong area una ng gilangkuban sa Sta. Cruz, Matanao, Magsaysay, Malalag, Hagonoy, ug Padadasa Davao del Sur; New Corella sa Davao del Norte; ug Monkayo sa Davao de Oro.
Una na sab nga gipailalom sa “orange” category gumikan sa presensiya sa mga NPA ang lugar sa Mabini, Maco, Maragusan, Montevista, New Bataan, ug Pantukan sa Davao de Oro; Lupon, Davao Oriental ug Kiblawan, Davao del Sur.
Nasayran sab kang Gultiano nga sukad gisugdan ang local campaign period sa rehiyon sa milabay nga Marso 25, malinawon sumala pa ang rehiyon ug walay natala ang otoridad nga mga election-related incidents, gawas sa “political statements” tali sa mga partido apan wala kini gikonsidera sa otoridad isip “harassments.”.
Wala sab sumala pay mga dapit karun sa rehiyon ang gipailalom sa pinakataas nga “red” category o kumbinasyon sa init nga panag-atbang sa mga politika ug adunay presensiya sa mga NPA.
Gipahugtan pa karon sa otoridad ang ilang operasyon aron lamang masiguro nga malinawon ang pipila ka mga areas sa rehiyon pipila ka adlaw ayha ang eleksiyon.
