DAVAO CITY – Padayon karun nga nadungagan ang ihap sa mga rebelde nga mibalik sa sabakan sa kagamhanan ug ubay-ubay na nga armas ang kalakip sab sa mga gitahan sa mga kanhi sakop sa rebeldeng grupo.
Kahinumduman nga anaa sa 11 ka mga high-powered firearms (HPFA) sa mga rebelde ang narekober sa otoridad sa tulo ka mga managlahi nga lokasyon atol sa hiniusang Joint Intelligence Operations sa 60th Infantry “MEDIATOR” Battalion, 10th Infantry “AGILA” Division, Philippine Army.
Kahinumduman nga gipangunahan sa intelligence operatives sa 60IB sa pagpanguna ni Lt. Col. Merrill C Sumalinog, Acting Commander of 60IB an g nakadiskobre sa mga armas sa Sitio Bagtok, Barangay Gupitan, Kapalong, Davao del Norte. Narekober sab sa mga nahisgutan ang duruha ka mga M16 rifles, usa ka (1) AK 47 rifle, ug usa ka (1) lower receiver sa M203 grenade launcher.
Laing duruha sab ka mga M16 rifles ang narekober ug usa ka M653 rifle ang nakuha usab sa susama nga unit sa Sitio Tagbalili, Barangay San Vicente, Loreto, Agusan del Sur.
Laing mga armas sab ang nadiskobre nga gilangkuban sa duruha ka M16 rifles sa Sitio Bubujawon, Barangay Waloe, Loreto, Agusan del Sur.
Ang nahisgutan nga lokasyon ang una na matud pa nga giyagyag sa kanhi miyembro sa Weakened Guerilla Front 3 (WGF3), Sub-Regional Committee 4 (SRC 4), Southern Mindanao Regional Committee (SMRC) nga kasamtangang mitahan sa 60IB sa milabay nga Pebrero 26.
Mayorya sa nahisgutan nga mga armas ang gipanag-iyahan sa mga rebelde nga kanhi kaubanan sa mga NPA nga mibalik na sa sabakan sa kagamhanan.
Kahinumduman nga ubay-ubay na ka mga nagkadaiyang unit sa NPA ang nabungkag human ang sunod-sunod nga mga operasyon nga gipahigayon sa otoridad subay na sab sa panawagan ni Pangulong Rodrigo Duterte nga tapuson na ang insurhensiya ayha siya mukanaug sa katungdanan sa bulan sa Hunyo.
