DAVAO CITY – Hingpit na matud pa karon nga nagmaayo ang 75 ka mga indibidwal nga natakdan ug Omicron variant sa Covid-19 dinhi sa dakbayan. Kahinumduman nga sa nahisgutan nga ihap, 65 ang local cases ug 10 ang returning overseas Filipinos (ROFs).
Sumala pa kang Dr. Michelle Schlosser, tigpamaba sa Davao City Covid-19 Task Force, nga human naka-rekober ang mga pasyente, gipahigayon gilayon ang PDITR (prevent, detect, isolation, treat, reintegration) strategy sa nahisgutan nga kaso.
Nasayran nga kabahin sa maong kaso ang specimens nga gikuha pipila ka bulan na ang milabay.
Sa higayon nga masubay sa DOH nga ang COVID-19 case mao ang bag-ong variant, kinahanglan nga mupailalom sa repeat swabbing, repeat contact tracing ug repeat isolation arun masiguro nga walay nagpadayon nga transmission.
Posible sumala pa ang kaso sa local Omicron cases ang gikan sa uban nga rehiyon nsanglit ang mandatory RT-PCR negative test requirement sa higayon nga mosulod sa dakbayan ang gitangtang na ug bugtong ang mga pasahero nga sakay sa international flights ang kinahanglan mag-presenta ug negative RT-PCR test sulod sa 72 ka oras ayha ang ilang flight paingon dinhi sa dakbayan.
Una na sab nga gibutyag ni Dr. Rachel Joy Pasion, Department of Health (DOH)-Davao Regional Epidemiology Surveillance Unit (RESU) head, nga adunay kinatibuk-ang 96 Omicron cases ang natala karon sa Davao region.
