DAVAO CITY – Luyo sa dakong bahad sa bag-ong variant Omicron, nagpadayon karon ang lokal nga kagamhanan sa pagpalig-on sa mga estratehiya sa COVID-19 response.
Sumala pa kang Davao City Mayor Inday Sara Duterte-Carpio, anaa pa gihapon sa pagpalig-on ang gihimong mga lakang ilabi na nga nagpabilin pa gihapon hangtud karong panahon ang pandemiya.
Gitutukan sab karon ang dakbayan ang pagpaspas sa boosters ingon man pagbaton ug igong supply sa oxygen plant.
Nakiglambigit sab karon ang lokal nga kagamhanan sa SPMC ilabi sa hisgutanan sa tambal ilabi na nga dili tanan ang nahatagan ug special compassionate use permits niini.
Samtang gikanayon ni Mayor Inday nga dili pa niya mabutyag sa kasamtangan ang posibilidad nga ibalik ang test-before-travel requirement sa Davao City-bound flight passengers sanglit bugtong ang Inter-Agency Task Force (IATF) for the Management of Emerging Infectious Diseases ang mohatag ug guidelines sa mga mosulod nga international flights dinhi sa siyudad.
Kahinumduman nga una ng gipailalom sa IATF ang South Africa, Botswana, Namibia, Zimbabwe, Lesotho, Eswatini, ug Mozambique uban ang Austria, Czech Republic, Hungary, The Netherlands, Switzerland, Belgium, ug Italy sa Red List human nga nakatala na ang nahisgutan nga mga nasod sa mas makatakod nga omicron variant sa Covid-19.
Mamahimo sumala pa nga makasulod ang mga Returning Filipinos pinaagi sa government-initiated o non-government-initiated repatriation ug Bayanihan Flights apan kinahanglan nga mopailalom kini sa testing ug quarantine protocols ilabi na kung gikan sa mga Red List countries.
