DAVAO CITY – Magpadayon karong adlawa ang Bayanihan Bakunahan national vaccination days nga gisugdan kagahapong adlawa.
Nagpahigayon og kick-off events ang tanang probinsya ug ang Dakbayan sa Davao aron ipakita sa ilang mga constituent nga luwas ang pagpabakuna batok COVID-19, ug aron usab maaghat silang magpabakuna.
Anaa sa 561 vaccination sites sa tibuok rehiyon ang nagadawat og mga vaccinee, naka-appointment man o walk-in.
Kinahanglan lang usab magkonsulta ang mga vaccinee sa ilang LGU alang sa mga rekisitos sa vaccination.
Tumong sa Department of Health XI nga mabakunahan sulod sa tulo ka adlaw nga national vaccination days ang anaa sa 724,125 ka mga indibidwal.
Kalabot niini, miangkon si DOH XI Assistant Regional Director Dr. Lenny Joy Rivera nga wala pay local government units dinhi sa Rehiyon Onse ang nakakuha na sa gina-target nga herd immunity.
Dugang pa niya, nagapadayon ang ilang kampanya sa pag-edukar ug pag-awhag sa mga tawo nag magpabakuna, ilabi na nga daghan pa ng mga dapit ang gamay lang ang ihap sa mga bakunado.
Sa mga dili makasalmot sa unang hugna sa national vaccination days, walay angay matud pa nga kabalakhan sanglit mahitabo sa Disyembre 15 hangtod 17 ang ikaduhang hugna niini.
