DAVAO CITY – Gipalig-on pa karon sa lokal nga kagamhanan ang information dissemination kalabot sa kamahinungdanon sa pagbakuna batok sa Covid-19 gumikan kay nagpabilin pa gihapon nga hagit ang pagkumbinsi sa pipila ka mga indibidwal gumikan sa ilang kahadlok ingon man ang mga mikatag nga fake news kalabot sa gikanayong zombie apocalypse sa higayon nga modawat sa bakuna.
Kini sumala pa ang hinungdan nga magmugna ang siyudad ug website diin ipasabot niini ang kamahinungdanon sa bakuna isip proteksiyon sa kaugalingon batok sa covid-19.
Kahinumduman nga una na sab nga gibutyag ni Mayor Sara Duterte-Carpio nga nakaabot na sab sa mga lumad ang mga mikatag nga fake news sa social media hinungdan nga pipila kanila ang mahadlok nga magpabakuna.
Una ng migula karon ang usa ka lalaki nga gikanayong sakop sa religious nga nag-awhag sa publiko nga dili magpabakuna gumikan kay mohatud lamang kini ug dili maayong epekto sa panglawas ug mamahimo sumala pa nga hinungdan sa kamatayon.
Gipasabot sa opisyal nga mas maayong maminaw sa mga eksperto ilabi na nga gihimo ang bakuna aron nga maluwas ang mga tawo batok sa makatakod nga kagaw.
