DAVAO CITY – Posibleng sa mosunod nga semana ipatuman na ang Semi-closed border sa Davao region human nga hingpit na matud pa nga gi-aprubahan ang hangyo sa lokal nga kagamhanan kini tungod pa gihapon sa pagsaka sa kaso sa Covid-19 sa mga kasikbit nga lugar sa rehiyon.
Una ng gibutyag ni Department of the Interior and Local Government (DILG) -11 regional director Alex Roldan nga gihan-ay na lamang karon sa lokal nga kagamhanan ang resolution ayha kini ipatuman gumikan kay kini ang mihangyo nga ipatuman ang maong lakang.
Sa higayon nga masugdan ang maong kamandoan, kinahanglan na nga mo-presenta ug dili molampas sa 72 ka oras nga negative RT-PCR test results ang mga mosulod sa davao region nga gikan sa kasikbit nga mga lalawigan.
Kinahanglan sab nga mopailalom sa makuti nga pagsukit-sukit aron masubay kung essential ang katuyoan niini sa pagsulod sa rehiyon.
Samtang ang mga taga dakbayan sa Davao nga moadto sa kasikbit nga lalawigan aron lamang mosuroy kinahanglan nga magdala ug negative RT-PCR test results sa pagbalik niini. Laraw sumala pa sa maong lakang nga mapugngan ang posibleng pagsaka o surge sa mga nagpositibo sa covid-19.
