DAVAO CITY – Gawas sa tinuig nga gift-giving sa mga vulnerable sector, ingon man paglimita sa kaadlawon ug panggabi-e nga misa, walay plano ang lokal nga kagamhanan nga magpahigayon ug mga Christmas activities kini aron malikayan ang mass gathering gumikan sa coronavirus pandemic.
Sumala pa kang Mayor Inday Sara Duterte nga walay Christmas activities nga himuon karon tuiga gumikan kay nagpabilin pa ang bahad sa makamatay nga Covid-19.
Apan una ng gibutyag sa Mayor nga bisan walay himuon nga programa, padula ug activities, magpabilin pa gihapon ang gift giving sa mga piniling sector nga naandan na sa siyudad matag tuig.
Karong tuiga ang City Social Welfare and Development Office (CSWDO) maoy manguna sa gift-giving diin sugod kaniadtong Disyembre 1 hangtud kagahapong adlawa, gigahin kini sa community-based children; December 3 hangtud 16 ang alang sa indigenous people’s group; December 5 ug 6 alang sa mga people living with HIV; December 12 ug 13 alang sa center-based children; December 14 hangtud 18 alang sa mga tawo nga disabilities ug senior citizens.
