DAVAO CITY – Patong-patong nga reklamo ang iduso batok sa pipila ka mga indibidwal human nga nasikop kini sa kapulisan nga nagsabong diin usa sa mga nahisgutan ang nakuhaan pa ug marijuana.
Kahinumduman nga balhog karon sa Toril PNP ang napulo ka mga indibidwal nga nadakpan sa gilusad nga ronda sa Brgy.Daliao, Toril District kagahapon.
Gikanayon wala na nakaikyas ang mga nahisgutan human nga napalibutan ug punoan ug saging ang lugar diin naatlan sa otoridad ang mga sabongero ingon man ang kuwarta nga ilang gipusta.
Una ng naila ang dinakpan nga sila si RANDY LUMPOT MAMACUS, 51 anyos, ulitawo, ALLAN BEDUYA POSTANES, 43 anyos, minyo, walay trabaho, LUIGI ENRIQUEZ DIEZ, 25 anyos, EMMANUEL UBAGAN BARATA, 42 anyos, ulitawo, ADONG BATO LAPA, 38 anyos, minyo, usa ka driver, RONNIE JOY RUELAN CABANTE, 26 anyos, SHELLO RAZONABLE FUENTES, 29 anyos, minyo, MICK CADENAS ATUEL, 31 anyos, minyo, DENNIS RAZONABLE PAGALAN, 40 anyos, minyo, usa ka mangingisda, ug JUNMER RAZONABLE PAGALAN, 32 anyos, ulitawo, diin ang mga dinakpan mga residente sa nahisgutan nga lugar.
Nakumpiska kanila ang duha ka mga manok pangsabong, mga tare ug kwarta nga pusta apan sa dihang gikapkapan ang mga nahisgutan nadiskubrihan nga ang usa kanila, naay gitipigan nga pinauga nga dahon sa marijuana sa iyang pitaka nga anaa sa bulsa ni Junmer Pagalan.
Balhog karon ang mga dinakpan sa Toril Police station nga nag atubang og kaso nga kalapasan sa PD. 1602 or illegal Gambling ingon man Possession of Illegal Drugs.
