DAVAO CITY – Dagkong mga pakete sa ginadili nga druga ingon man mga kemikal ang nadiskobrehan sa inabandona na bahay sa Purok Bagani, Brgy Cuambogan, Tagum City.
Gikanayong ang nahisgutan nga panimalay ang gipanag-iyahan sa usa ka Marivic Wong Tan Casis, kansa nabilanggo karon sa Tagum City Jail gumikan sa kalapasan sa RA 9165 tungod sa pagkalambigit sa ginadili nga druga atol sa gilusad nga operasyon sa PDEA-11 kaniadtong tuig 2018.
Sumala pa kang Regidor Lubiano Tan Casis, amahan ni Marivic Wong Tan Casis , gibaligya niya ang atop sa maong pinuy-anan sa usa ka Mr. Eliseo Eradea Isaal, residente sa Purok Bagani, Brgy. Cuambogan, Tagum City.
Samtang gitangtang ang atop, nadiskobrehan sa karpentero ang pipila ka mga items hinungdan nga mi-report gilayon siya sa Tagum City Police Station.
Gilayon nga miadto ang mga personahe sa kapulisan sa pagpanguna ni P/Cpt. Anjanette Tirador, OIC-Tagum City Police Station kaabag ang uban lang law enforcement unit.
Narekober sa lugar ang mga shabu, controlled precursors ug mga kemikal nga gigamit sa paggama ug shabu. Gikanayong kapin kun kulang 1, 555 grams sa shabu ang narekober o adunay street value nga Php 23, 325,000.00, lakip na ang mga nagkadaiyang laboratory glass wares ug mga kemikal.
Ang nga nakumpiskang shabu ang anaa karon sa kustodiya sa PDEA 11 alang sa ipahigayon nga qualitative ug quantitative examination.
Samtang padayon karon ang panawagan ni P/Cpt. Tirador, sa tanan nga mga residente sa Tagum nga suportahan ang kapulisan sa ilang kampanya batok illegal nga druga ug kanunay nga magbinantayon batok sa mga illegal nga aktibidad.
