DAVAO CITY – Gipalawman pa karon sa kapulisan ang ilang imbestigasyon aron masayran ang motibo sa pagpatay sa negosyante kinsa gipusil pasado alas kuwatro kagahapon sa hapon sa Dacudao Avenue, Brgy. Paciano Bangoy Agdao Dist. ning siyudad.
Naila ang biktima nga si Paul Andrei Fabian Diaz, 28 anyos residente sa Durian Town House Rivera Village Barangay Paciano Bangoy ning dakbayan. Sumala sa nakasaksi, sakay sa motorsiklo ang wala mailhing suspetsado nga mipusil sa biktima samtang padulong unta sa iyang shop ug gikan nagmeryenda.
Kahinumduman nga gipusil sab kaniadtong oktubre sa milabay nga tuig ang biktima sa Anglionto Road samtang naghatod sa iyang anak nga sakay sa pick-up apan nakahimo kini pagdagan ug nakapangayo ug tabang sa kapulisan.
Narekober sa crime scene ang upat ka mga basiyo sa bala nga gituohan nga iya sa .45 caliber pistol.
Padayon karon ang gipahigayon nga imbestigasyon sa kapulisan aron nga masayran kung si kinsa ang utok sa maong krimen.
