DAVAO CITY – Nagbahad ang ahensiya sa Regional Anti-Cybercrime Unit (RACU) 11 nga magpadayon ang ilang pagtutok sa mga tawo nga nagapakatag ug sayop nga impormasyon o fake news sa social media kalakip na kadtong mga tawo nga nagbahad karon sa kinabuhi ni Pangulong Rodrigo Duterte.
Sumala pa kang Police Capt. Julius Santillana, head sa RACU-11, nga anaa na sa upat ka mga indibidwal ang ilang napakasahan dinhi sa siyudad tungod sa pagpakatag ug sayop nga impormasyon kalakip na niini kadtong nagpakatag ug daw gisundog ang tingog ni Davao City Mayor Inday Sara Duterte-Carpio.
Hinuon gikanayon ni Pol. Capt. Santillana nga sa kasamtangan, wala pa silay namonitor nga taga dakbayan sa Davao nga nagbahad sa kinabuhi ni Pangulong Duterte. Kahinumduman nga ubay-ubay na ang napasakahan ug kasong inciting to sedition human nga gibutyag sa mga suspek nga andam sumala pa sila nga mohatag ug milyon ka pesos nga reward sa makapatay sa pangulo.
Apan adunay mga nag-post nga nagkanayong na-hack lamang ang iyang account hinungdan nga nagpahimangno ang ahensiya nga kinahanglan magbinantayon aron nga dili magamit sa uban.
Nasayran nga ang mga madakpan nga nalambigit sa susama nga binuhatan ang mamahimong mabilanggo ug maka-multa ug P400,000.
