DAVAO CITY – Sugdan na karong adlawa sa lokal nga panggamhanan sa Tagum ang ikaduhang round sa pagpanghatag og food packs sa kapin 103,000 ka mga pamilya nga apektado sa enhanced community quarantine (ECQ).
Sumala pa kang Tagum City Mayor Allan Rellon, himuon nila nga house-to-house ang pagpanghatag og food packs sa 103,056 ka mga pamilya hangtud sa Abril 25.
Unod niini ang unom ka kilo nga bugas ug unom ka delata.
Gipahimangnoan sab niini ang mga residente nga magbutang og bangko atubangan sa ilang panimalay diin ibutang na lamang sa distributors ang food packs kini aron nga mapabilin ang social distancing.
Sa kasamtangan, gi-andam na sab sumala pa nila ang tabang sa Department of Social Welfare and Development (DSWD) ilalom sa Social Amelioration Program.
