Ctto: PIO DCPO
DAVAO CITY – Gipasidunggan sa Police Regional Office (PRO) XI si Police Corporal Joel Villegas gumikan sa gipakitang ka-isog ug ka-andam nga i-buhis ang iyang kinabuhi aron lamang pagtuman sa iyang gipanumpaan.
Kaganinang buntag, personal nga giduaw ni PRO XI Regional Director Brig. General Marcelo Morales kauban si Davao City Police Office (DCPO) Director Col. Alexander Tagum si Villegas nga kasamtangang naka-confine sa Southern Philippines Medical Center.
Gihinabi kadali ni General Morales si Corporal Villegas labot sa nahitabo niadtong adlaw nga Sabado sa Barangay Mahayag, Bunawan ning syudad diin ilang gika-engkwentro ang duha ka mga wanted persons nga miresulta sa pagka-angol sa nahisgutang police human maka-angkon ug tulo ka mga samad pinusilan.
Gawas sa medal for wounded PNP personnel nga nadawat ni Villegas, gina-proseso na usab sumala pa sa PRO XI ang mga dokumento alang sa promotion sa mas taas nga ranggo niini.
Tubagon na usab sumala pa sa PNP ang tanang bayrunon sa ospital ni Villegas.
Sa higayon nga hingpit nang magmaayo sa iyang mga samad ug makabalik na sa serbisyo, gikanayon ni General Morales nga priority si Villegals alang sa schooling ug uban pang mga trainings sa PNP.
Kahinumduman nga napatay usab sa mga police sa Bunawan ang wanted nga suspek nga si Baselio Monteroso Abrigoso nga adunay kasong homicide samtang nadakpan sab ang lain pang usa ka kauban niini.
