DAVAO CITY – Padayon pang ginasuta sa kapulisan kung biktima ba sa pagpanglugos ang usa ka kuwatro anyos nga batang babaye nga na-una nang nakaplagang naglutaw sa usaka fishpond ug walay nay kinabuhi sa Sitio Mangani, Barangay Tapak, Paquibato, ning dakbayan sa Dabaw.
Giila ang biktima nga si alyas Windy Man-ologan, daycare pupil ug nagpuyo sa nahisgutan nga dapit.
Pinasikad sa taho sa Paquibato Police station, namatikdan na lamang sa mga ginikanan sa bata nga nawala ang ilang anak gikan sa gihigdaan niini ala una sa kaadlawon.
Human ang pila ka oras nga pagpangita uban sa ilang mga silingan, pakyas ang mga ginikanan nga makaplagan ang ilang anak.
Apan pagka-buntag, nakaplagan na ang bata nga naglutaw ug wala nay sinina sa usa ka fishpond dili kaayo layo gikan sa ilang pinoy-anan.
Una nga gituohan nga nalumos ang biktima apan nakita sa kapulisan ang mga samad sa baba ug na-lahi na usab ang porma sa kinatawo niini hinungdan nga gikatahapang biktima kini sa pagpanglugos.
Gikatakdang ipa-ilalom ang patay nga lawas sa biktikma sa otopsiya.
