DAVAO CITY – Gipahigayon na kagahapong adlawa ang send off ceremony sa mga nagkadaiyang security forces aron maoy magpatuman ug hugtanon nga seguridad sa ipahigayon nga Kadayawan sa Davao 2019.
Gihimo ang seremonya sa Davao City Police Office (DCPO) ground sa Camp Domingo E Leonor, San Pedro St. Davao City nga gitambongan sa mga opisyal sa otoridad ug ni Davao City Vice Mayor ug kasamtangang acting Mayor nga si Baste Duterte.
Kahinumduman nga ugmang adlawa na himuon ang pag-abli sa aktibidad sa Magsaysay Park ning dakbayan. Una ng nagpahimangno ang otoridad sa publiko nga laoman ang pagpatuman ug hugtanon nga seguridad ilabi na nga naka-full alert sila karong panahona.
Mihangyo sab ang otoridad ug kooperasyon sa katawhan sanglit alang lamang sa kaayohan sa tanan ang mga lakang nga ilang gihimo.
Kahinumduman nga sa milabay nga adlaw, nagpahigayon ang mga nagkadaiyang security forces ug simulation aron masukod ang ilang katakos sa pag-responde sa higayon nga adunay dagkong insidente sa dakbayan nga binuhatan sa mga dautan nga elemento.
