DAVAO CITY – Gibutyag ni Police Regional Office-Davao Director Marcelo Morales nga magpadayon ang ilang pagpatuman sa Internal Cleansing Program aron nga mahunong ang mga dili maayong binuhatan sa mga kapulisan.
Kahinumduman nga nagpadayag sa iyang kadismaya ang opisyal gumikan kay luyo sa pagdisiplina nga ipatuman sa mga kapulisan aduna pa gihapoy pipila ang pabilin nga nagpabadlong nga maoy makapaguba sa imahe sa kapulisan.
Ang pahayag sa opisyal adunay kalabotan sa ulahing insidente diin usa ka non-commissioned police officer ang nag-atubang ug kasong administratibo ug kriminal human nga gikulata niini ang usa ka sibilyan sulod sa sabungan sa Santa Marta, Catalunan Grande, Davao City.
Una ng naila ang suspek nga si Patrolman Jerry Gilvero Gumapac, 37, minyo, nadestino sa Toril Police Station ug residente sa Sitio Toril, Catalunan Grande ning siyudad.
Gikanayong mireklamo si Jake Fontillas Ajos, 27 anyos, residente sa Goldland Subdivision sa Bago Gallera ug igsuon niini ug witness nga si Clint Fontillas Ajos, 20 anyos, gumikan kay samtang nagpatad sila sa sabong, gi-akusahan sumala pa sila ni Gumapac nga mikuha sa iyang kuwarta sa iyang wala nga bulsa dayon sumbag sulod sa upat ka higayon tumong sa nawong ug nagkadaiyang parte sa lawas.
Gani padayon sumala pa niya kini nga gikulata bisan tuod nga nagbuy-od na ang iyang igsuon.
Dali nga miadto ang biktima sa duol nga police station ug gi-report ang insidente.
Gilayon nga gisikop sa Talomo police ang suspek ug kasamtangan nga gibalhog sa Talomo Police Station. Nag-atubang ang nahisgutan ug slight physical injuries nga giduso pinaagi sa inquest proceedings.
