DAVAO CITY – Karon pa lang nanawagan na si Col. Consolito Yecla, commander sa Task Force Davao (TFD) ngadto sa publiko nga motamud sa mga ipatuman nga panawagan ilabi na kadtong adunay plano nga magsuroy-suroy sa Kadayawan sa mosunod nga bulan.
Sumala pa kang Col. Yecla bisan nga gawasnon ang publiko nga mag-enjoy sa kapiyestahan, kinahanglan nga motamud kini sa mga pahimangno sa otoridad gumikan kay alang lamang sa kaluwasan ang ilang gihimo.
Gitumbok sa opisyal ang ilang ipatuman nga No Jacket Policy ingon man No Back pack Policy ilabi na sa mga lugar nga adunay dagkong aktibidad nga ipahigayon.
Gitataw sab ni Col. Yecla nga kung molatas man sa mga check point, kinahanglan nga mobuon ang jacket alang sa body check.
Nanawagan ang opisyal sa publiko nga unta dili hatagan ug negatibo ang impresyon ang maong lakang sa otoridad gumikan kay alang lamang kini sa kaluwasan sa tanan ug mapugngan kadtong mga adunay dautan nga plano.
Samtang nagtuo sab ni Generose Tecson, head sa City Tourism Operation Office (CTOO) nga dili mohatud ug negatibo nga impresyon ngadto sa mga turista ug bisita sa siyudad ang pagpatuman sa No jacket policy inay makapa-awhag pa kini gumikan kay sigurado sila sa ilang seguridad.
