DAVAO CITY – Nasikop sa gilusad nga operasyon sa kapulisan ang usa ka online trafficker diin gigamit ang ilang duruha ka anak nga batang lalaki sa sexual exploitation gamit ang internet.
Dakpan ang suspek nga nailang si alyas Connie, 35 anyos atol sa entrapment operation nga gipahigayon sa Philippine National Police’s (PNP) Women ug Children Protection Center–Mindanao Field Unit (WCPC-MFU) ingon man Regional Anti-Cybercrime Unit (Racu)-Davao kagahapon sa udto.
Nasikop kini sa iyang pinuy-anan sa Carmen, Davao del Norte human nga nagpadala kini ug litrato sa iyang 4 anyos nga anak nga sexually abused gamit ang online messaging platform bugti sa salapi.
Naluwas ang bata sa ilang pinuy-anan samtang ang iyang 11 anyos nga igsuon ang naluwas usab sa lain nga lokasyon.
Nasayran nga sa milabay nga bulan sa Mayo ning tuig kasamtangan, ang mga representante gikan sa Department of Justice’s Inter-Agency Council Against Trafficking (DOJ-Iacat)–Davao ang nakiglambigit sa WCPC-MFU human nasayran ang kalabot sa online sexual exploitation of children (Osec) case nga gi-refer sa Australian Federal Police ngadto sa PNP.
Nakita sumala pa sa gipadala nga hulagway ang duruha ka anak ni alyas Connie nga anaa sa child sexual exploitation materials sa cellphone nga iya sa lalaki nga Australian sex offender. Nasayran sab sa Forensic analysis nga adunay komunikasyon si Conne ug ang Australian perpetrator.
Sa kasamtangan, anaa sa kustodiya sa Department of Social Welfare and Development (DSWD) ang duruha ka anak sa suspek.
Gi-andam na ang kaso batok sa inahan nga hayang mabilanggo sa tibuok niya nga kinabuhi ug pamultahon ug P2 million ngadto na sa P5 million.
