DAVAO CITY – Tutokan karon sa City Engineer’s Office (CEO) ang mga drainage system sa siyudad human namatikdan nga halos tanan nga areas sa dakbayan ang makasinate ug pagbaha ilabi na kung mobundak ang kusog nga ulan.
Sumala pa kang CEO head Joseph Felizarta nga luyo matud pa sa pagpaningkamot sa dakbayan sa pagpalambo ug pagkumpuni sa mga kanal, nagpabilin pa gihapon nga suliran ang pagtaas sa tubig ilabi na panahon sa ting-ulan.
Gani, kanunay sumala pa ang ilang komunikasyon ngadto sa Department of Public Works and Highways (DPWH)-Davao ug Ancillary Services Unit (ASU) aron nga masolusyonan ang maong problema. Gi-angkon sab sa nahisgutan nga nalisdan sila sa pagpatuman sa rehabilitations ilabi na nga dili sumala pa tanan nga mga proyekto ang sakop sa CEO.
Nasayran nga sa downtown area, giila nga mga flood prone area ang dalan sa J.P. Laurel Avenue.
Una na sab nga gibutyag ni Office of the City Building Official (Ocbo) head Cirinia Grace Catubig nga ang kasamtangan nga drainage system sa siyudad ang dili igo aron nga masuyop ang tubig panahon nga mobundak ang ulan.
Gitataw sab ni ASU head Paul Bermejo nga usa sa gibantayan nila karon mao kadtong nagatukod ug mga gambalay diin ang mga construction debris modiretso sa mga kanal nga maoy hinungdan sa pagkabara niini.
