DAVAO CITY – Gitinguha karon sa kapolisan sa Malita, Davao Occidental nga maila ug madakpan ang mga armado nga mirapido sa usa ka negosyante ug last two financier nga naila nga usa ka Wilfredo Valensona, alyas Digong kinsa gipusil mga alas 3:00 ang takna sa hapon sa Barangay Lakaron, Malita, Davao Occidental.
Una nang nasayran nga ang biktima mao ang nag-manage ug sabongan nga gipanag-iya sa pamilyang Bautista sa Malita, Davao Occidental.
Didto sa iyang uma ang biktima dihang kalit nga mi-abot ang itom nga pick-up diin sakay ang mga armado nga mipaulan ug bala punterya ngadto kaniya nga mao ang hinongdan sa iyang hinanali nga kamatayon.
Grabeng samag sa kalawasan ug nabuak ang bagul-bagul sa biktima ug nakuha sa kapolisan sa crime scene ang nagkada-iya nga bala sa M14 ugt M16 armalite rifle.
Dali sab nga miikyas ang mga suspetsado human maseguro nga ilang napatay ang biktimang negosyante.
Nasayran nga atol sa krimin wala’y plate number ang itom nga pick-up nga gigamit sa mga suspek.
Anggulo nga may kalabotan sa personal nga dumot ug bangi sa negosyo ang gitotokan sa kapolisan sa Malita, Davao Occidental.
