DAVAO CITY – Giduso karon sa Davao City Risk Reduction Management Office (CDRMMO) ang lokal nga ordinansa nga mas magpalambo sa water ways sa siyudad aron nga malikayan ang grabe nga pagbaha.
Sa kasamtangan, nagpadayon sumala pa ang ilang pagtuon aron nga masolusyonan ang grabe nga pagbaha ilabi na sa may La Verna Hills Subdivision sa Buhangin ingon man ma-update ang Comprehensive Land Use Plan.
Sumala pa kang CDRRMO head Rodrigo Bustillo, gitun-an na nila karon kaabag ang Davao City Planning and Development Office ang mga hazard areas lakip na ang no build zone dinhi sa siyudad.
Girekomenda sa opisyal ang relokasyon sa mga residente nga nahimutang duol sa creek gumikan kay delikado ang lugar ilabi na kung adunay pagsaka sa tubig panahon nga mobundak ang ulan ug sagad sab sa mga residente nga anaa sa maong dapit maoy hinungdan sa pagbara sa mga drainage system gumikan sa gilabay nga mga basura.
Gikanayong paspas sumala pa ang pagsaka sa tubig baha sa La Verna Hills gumikan kay ang tubig nga gikan sa Cabantian ang modiretso sa maong dapit.
Gipasalig ni Bustillo nga mapalambo na ang drainage system sa dakbayan, malikayan na matud pa ang mga insidente nga adunay mga motorista nga ma-stranded panahon nga adunay mga pagbaha.
